Athchóiriú Iascaigh Bainte amach: Todhchaí níos gile d'Iascach

Ar maidin bhain Uachtaránacht na hÉireann ceann dá tosaíochtaí is airde amach le comhaontú ar Chomhbheartas Iascaigh nua san AE.

Dúirt an tAire Coveney, ag fáiltiú dó roimh an gcomhaontú: "Ag  tús Uachtaránacht na hÉireann leag mé amach clár oibre uaillmhianach, dúshlánach, mar gur chreid mé gur ghá go dtarlódh athchóiriú ár gcuid iascach anois."

Aire Coveney - "Tar éis míonna de dhianchaibidlíocht faoi mo stiúir, tá an-áthas orm gur aontaíomar beartas anois atá praiticiúil, inchurtha chun feidhme agus ceann a chuireann inbhuanaitheacht go daingean ag a chroílár."

"Is beartas é a chinnteoidh tionscal bríomhar, ríthábhachtach, agus stoc iascaigh sláintiúil go ceann i bhfad."

I measc na n-éachtaí faoin gComhbheartas Iascaigh nua tá siad seo a leanas:

• Leis an mbeartas nua beidh orainn cuótaí a shocrú a urramóidh comhairle eolaíochta go hiomlán. Tabharfaidh sé sin stoic éisc shláintiúla agus cuótaí níos airde, agus stoic éisc á  mbainistiú ag na leibhéil uasta atá inbhuanaithe.
• Ní cheadófar stoic éisc a chuileáil  feasta. Cuireann sé sin deireadh leis an seanbheartas a chuireadh iallach ar iascairí bia a chur amú trí éisc a chaitheamh san fharraige. Tabharfaidh  an beartas nua cuótaí níos airde le haghaidh ár n-iascairí.
• Cuireann an beartas nua iascairí ag croílár bearta teicniúla agus caomhnaithe a fhorbairt le héisc óga agus speicis éisc leochaileacha a chosaint trí chur chuige cinnteoireachta réigiúnaithe a bheidh go hiomlán nua. Is athrú mór é sin mar go dtí seo bhíodh an chinnteoireacht láraithe sa Bhruiséil.
• Tiomantas le ceantair atá íogair go bitheolaíoch a fhorbairt agus a neartú, le láithreacha sceite agus daonraí arda iasc óg.

Faoi dheireadh na cuileála, dúirt an tAire Coveney "Bhí an ghné chasta seo ar na cinn ba chonspóidí agus ba dheacra a aontú mar gheall ar go leor peirspictíochtaí éagsúla ar an gcaoi a  bheadh ​​ toirmeasc ag obair go praiticiúil. A bhfuil comhaontaithe againn ar maidin, sin beartas iascaigh nua a fhéachann le cabhrú lenár stoic éisc a thabhairt ar ais agus na hiascairí agus na pobail atá ag brath ar an iascach dá  slí bheatha a chosaint."

Ní hamháin go dtugann an t-athchóiriú, ina iomláine, cosc ar chuileáil ach freisin soláthraíonn sé acmhainn do bhealaí nua iascaigh inbhuanaithe, margadh níos trédhearcaí agus níos iomaíche, chomh maith le hiascairí a chumhachtú le ról lárnach sa chinnteoireacht dá gcuid iascaigh a thabhairt dóibh.   

Thángthas ar an gcomhaontú idir Uachtaránacht na hÉireann, Parlaimint na hEorpa agus an Coimisiún Eorpach agus beidh air anois dul chuig Coiste na mBuanionadaithe le formheas críochnaitheach a fháil.

A CHRÍOCH SIN